Gras a thangnefedd i chwi

Paul, apostol Crist Iesu trwy ewyllys Duw, at y saint sydd yn Effesus, yn ffyddlon yng Nghrist Iesu. Gras a thangnefedd i chwi oddi wrth Dduw ein Tad a'r Arglwydd Iesu Grist. - Effesiaid 1:1-2

Mae cwrdd â Iesu yn newid pobl.

Ar un adeg, barn a melltith oedd dymuniad pennaf Paul ar gyfer yr eglwys. Wrth iddo dynnu at ddiwedd ei yrfa fel Pharisead, ymroddodd Paul ei holl nerth i erlid eglwys Iesu Grist. Ond newidiodd popeth i Paul pan gyfarfu â Iesu Grist ar y ffordd i Ddamascus. Profodd Paul newid llwyr yn ei fywyd; fe aeth o fod yn erlidiwr i fod yn apostol, am fod Duw wedi dewis ei ddefnyddio i gyhoeddi Crist i'r cenhedloedd. Fe aeth o fod yn bechadur mewn gwrthryfel chwyrn yn erbyn Duw i fod yn sant ac yn aelod o eglwys Crist. Yn ei lythyr i'r eglwys yn Effesus, mae'r Apostol Paul yn ysgrifennu at frodyr a chwiorydd, seintiau sydd, fel Paul, wedi derbyn Iesu yn Waredwr. Nid barn a melltith yw dymuniad Paul ar gyfer yr eglwys bellach, ond gras a thangnefedd.

Roedd derbynnwyr ei lythyr eisoes wedi profi gras a thangnefedd. Roedden nhw eisoes wedi profi gras drwy dderbyn maddeuant am eu pechodau, maddeuant a enillodd Iesu Grist unwaith ac am byth ar eu cyfer nhw drwy farw ar y groes. Roedden nhw eisoes wedi profi tangnefedd drwy gael eu cymodi â Duw a'u mabwysiadu gan eu Tad nefol. Ond roedd Paul yn dymuno iddyn nhw brofi mwy o ras a mwy o dangefedd eto oddi wrth Dduw y Tad a'r Arglwydd Iesu Grist!

Pan briododd Elen a minnau, mi ddes i'n ŵr iddi yn y fan a'r lle. Roedd y berthynas wedi selio yr eiliad y cyfamodom â'n gilydd ger bron Duw. Ond yn y blynyddoedd ers inni briodi, mae hi wedi parhau i ddangos gras i mi, ac wedi amlhau ei gras hi ataf fi fel dyn ffaeledig, amherffaith sydd, ar lawer achlysur, wedi ei siomi hi! Mae pob methiant ar fy rhan i yn gyfle iddi ddangos ei chariad a'i gras hi tuag ataf dro ar ôl tro. Roedd y briodas wedi ei selio yn ôl ym mis Gorffennaf 2020, ond mae'r gras rydw i wedi profi ers hynny heb stopio amlhau.

Mae Duw yn tywallt ei ras arnom yng Nghrist yr eiliad rydyn ni'n dod i berthynas gyda Iesu, drwy roi ein ffydd ni ynddo fe a'i gofleidio fel ein priod ni a'n rhan. Ond mae gras a thangnefedd Duw tuag atom yn amlhau yn feunyddiol wrth i ni brofi ei faddeuant a'i garedigrwydd yng nghanol ein pechod a'n methiannau parhaus. Mae'r berthynas wedi selio unwaith ac am byth drwy aberth Iesu, ond mae'r Arglwydd Dduw yn parhau i dywallt ei ras a'i dangnefedd arnom. Diolch iddo!

Amser i fyfyrio

1. Ym mha ffyrdd ydw i angen pwyso ar ras Duw heddiw?

   
   

2. Ym mha ffyrdd mae'r tangnefedd sydd rhyngof i a Duw yn gysur i mi?

   
   

3. Dros bwy fedrai weddïo ar i'r Arglwydd dywallt ei ras a'i dangnefedd arnyn nhw?

   Meddyliwch am sefyllfaoedd penodol ym mywydau'r bobl mae'r Arglwydd wedi rhoi yn eich bywyd chi heddiw.